Një zyrtar policor me gradën rreshter është arrestuar sot në Pejë për veprat penale dhunim, shantazh, fotografimi dhe incizimet tjera të paautorizuara.

Inspektorati Policor i Kosovës thotë se rreth një muaj më parë kishte pranuar informacione përmes rrugëve operative se ai mund të jetë i përfshirë në aktivitete të kundërligjshme.

“Bazuar në këto informacione, hetuesit e IPK-së, në koordinim me prokurorin kompetent, filluan të ndërmarrin veprime hetimore/operative ndaj zyrtarit policor., Bazuar në dëshmitë dhe provat e mbledhura hetuesit e IPK-së kanë arrestuar sot në orët e mbrëmjes zyrtarin policor të përfshirë në këtë rast me dyshimin se i njëjti ka kryer vepër penale dhe atë nga neni 227, 329 dhe 202 i Kodit Penal të Republikës së Kosovës”, thotë IPK.

Sipas kodit penal të Kosovës, neni 227, kushdo që detyron personin tjetër për të kryer akt seksual pa pëlqimin e personit të tillë, dënohet me burgim prej dy deri në 10 vjet.

Në vazhdën e veprimeve hetimore, operacioni ka vazhduar me bastisje në Pejë bazuar në urdhëresën e Gjykatës Themelore në Pejë ku janë gjetur dhe sekuestruar prova të ndryshme.
Policit të arrestuar me aktvendim të prokurorit i është caktuar masa e ndalimit për 48 orë.

“Veprimet e mëtutjeshme hetimore lidhur me këtë rast do të vazhdojnë nga hetuesit e IPK-së në konsultim të vazhdueshëm me prokurorin përgjegjës”.