Ushtria izraelite njoftoi se “pauza humanitare” që vazhdonte prej një jave ka përfunduar dhe se ka rifilluar sulmet e saj në Rripin e Gazës, transmeton Anadolu.

Bëhet e ditur se “pauza humanitare” që hyri në fuqi më 24 nëntor në kuadër të marrëveshjes mes Izraelit dhe Hamasit ka përfunduar mëngjesin e sotëm në orën 06:00.

Në një deklaratë me shkrim nga ushtria thuhet se Hamasi ka shkelur “pauzën humanitare” dhe theksohet se “Ushtria izraelite ka rifilluar operacionet e saj kundër Hamasit në Rripin e Gazës”.

Avionët luftarakë izraelitë bombarduan zona të ndryshme në Rripin e Gazës.

“Avionët luftarakë të Forcave të Mbrojtjes të Izraelit po sulmojnë tani objektivat e organizatës ‘terroriste’ Hamas në Rripin e Gazës”, tha ushtria izraelite në një deklaratë në X.

Avionët luftarakë izraelitë shënjestruan disa zona në Rripin e Gazës, raportoi gazetari i Anadolu në terren.

Të paktën 5 palestinezë u vranë dhe disa të tjerë u plagosën në sulmet ajrore të ushtrisë izraelite në Rripin e Gazës menjëherë pas përfundimit të pauzës humanitare të premten në mëngjes, thanë burimet mjekësore për Anadolu.

– Avionët luftarakë izraelitë mbi Gaza

Në një deklaratë nga Ministria e Brendshme në Gaza vihet në dukje se me përfundimin e “pauzës humanitare” avionët luftarakë izraelitë kanë filluar të fluturojnë mbi Gaza.

Thuhet se automjetet ushtarake të Izraelit kanë hapur zjarr ndaj pjesës veriore të Gazës.